Каспий теңізінде итбалықтың өлімі туралы ақпарат

  Бұған дейін хабарланғандай, 2024 жылдың 29 наурызы мен 1 сәуірі аралығында Жайық-Каспий облысаралық бассейндік балық шаруашылығы инспекциясының (бұдан әрі – Инспекция) Маңғыстау облысы бойынша балық инспекциясы басқармасының қызметкерлері Түпқараған ауданында Каспий теңізінің жағалауына мониторинг жүргізу барысында 78 өлі итбалық ұшасын тапты.

     Маңғыстау облысының экология департаменті су сынамаларын алды, Ветеринариялық станция мен гидробиология және экология институтының қызметкерлері ішкі ағзалардың тіндерін (бауыр, өкпе) ішінара іріктеді, ал Каспий итбалығын зерттеу және оңалту орталығы тиісті зертханалық зерттеулер жүргізу үшін азу, тырнақ және жүн сынамаларын алды. Бүгінгі күні зертханалық зерттеулер жүргізу сатысында.

     Сонымен қатар, 2024 жылдың 8 сәуірінде Инспекция қызметкерлері тағы 25 өлі итбалық өлекселерін тапты.

     Қолданыстағы өзара іс-қимыл схемасына сәйкес жұмыс тобының барлық мүшелері (жергілікті атқарушы органдар, мамандандырылған ғылыми ұйымдар, Каспий итбалығын зерттеу және оңалту орталығы, Гидробиология және экология институты, қазақстандық Қолданбалы Экология Агенттігі, Микробиология және вирусология ғылыми-өндірістік орталығы, облыстың ветеринариялық қызметі, экология және полиция департаменттері, табиғат қорғау прокуратурасы) жедел түрде хабардар етілді.

       Инспекция мен жергілікті атқарушы органдардың өкілдерінен тұратын жұмыс тобы итбалықтар анықталған орынға шықты.

       Бүгінгі таңда табылған өлі итбалықтардың  жалпы саны-103 құрады.

       Жайық-Каспий облысаралық бассейндік балық шаруашылығы инспекциясының қызметкерлері Каспий теңізінің жағалау аймағының мониторингін жалғастыруда.

      Ақпарат түскен сайын жаңартылады.